Fréttir

Hin árlega piparkökukeppni heimilisvalsins var haldin í dag en hún hófst með sýningu á húsunum fyrr í dag og leynilegri kosningu.

Varmahlíðarskóli er þátttakandi í verkefninu Heilsueflandi grunnskóli. Á skólaárinu 2013 -2014 verður unnið sérstaklega með þáttinn geðrækt.

Á Degi íslenskrar tungu, 16. nóvember síðastliðinn, blés Kammerkór Skagafjarðar til dagskrár í tali og tónum tileinkaða Þorsteini Erlingssyni skáldi. Nemendur 7. bekkjar tóku þátt í dagskránni og sögðu frá ævi og störfum skáldsins auk þess sem þeir sungu með kórnum en líka ein og sér.

Það var álit flestra að aðventuföndurdagur foreldrafélagsins í gær hafi tekist afar vel.

Á morgun fimmtudag hvetjum við foreldra og/eða aðra aðstandendur að koma með börnum sínum og eiga skemmtilega stund með þeim í undirbúningi jólanna. Margar skemmtilegar stöðvar verða í boði og geta þátttakendur valið það sem þeim hugnast best og farið á milli stöðva eins og þeir vilja. Tálgað jólasveina, jólakort, föndra úr pappír og filti, búa til jólaluktir úr krukkum, spila ýmis spil, dansa á jóladiskói, fara á kaffihús, hlusta á jólasögur, hlusta á nemendur tónlistaskólans spila og fara í jólamyndatöku! Allir geta fundið eitthvað við sitt hæfi. Nemendum er ekki skylt að mæta í þessa samverustund og verður heimkeyrsla strax eftir hádegismat fyrir þá sem ekki ætla að taka þátt. Við viljum endilega sjá sem flesta aðstandendur, allir velkomnir og nauðsynlegt er að einhver sé með hverju barni, sérstaklega í yngstu bekkjunum. Endilega látið ömmur og afa, frænkur og frænda og velviljara skólans vita, allir velkomnir að kíkja við. Skólabílar keyra ekki heim að lokinni aðventugleði og foreldrar þurfa að sjá um að koma börnum heim. 10.bekkur selur vöfflur og kakó á kaffihúsi í matsalnum til styrktar ferðasjóði sínum.

„Kveiktu á kerti frekar en að sitja í myrkrinu“. Varmahlíðarskóli er heilsueflandi grunnskóli og í vetur leggjum við áherslu á geðrækt. Auk fræðslu innanhúss er áætlað að fá fyrirlestra fyrir nemendur, aðstandendur og starfsfólk um geðræktarmál. Sérstök áhersla verður lögð á geðorðin 10 og fær hver umsjónarbekkur sitt geðorð til að kryfja og miðla þekkingu um. Geðveikt horn er að fæðast í setustofunni þar sem fræðsluefni verður sýnilegt og þar verður kassi sem má setja í nafnlausar fyrirspurnir og óskir um allt er viðkemur andlegu heilbrigði. Síðast en ekki síst er markmiðið að minnka fordóma um það að vera „geðveikur“ , vinna að forvörnum og fræða um hvernig og hvar er hægt að fá hjálp. Settur verður upp tengill á heimasíðu skólans um heilsueflandi grunnskóla og hvað skólinn okkar hefur gert til að standa undir merkjum.

Í dag var haldið upp á Dag íslenskrar tungu með fjölbreyttum skemmtiatriðum eins og sést á meðfylgjandi myndbandi.

Á morgun munu allir sem vettlingi geta valdið mæta í lopapeysum í skólann. Þar að auki verðum við með samkomu í setustofunni í tilefni af degi íslenskrar tungu á laugardaginn þann 16. nóvember. Þar munu nemendur úr 2. 4. 6. 8. og 10. bekkjum stíga á stokk með undirbúin atriði sem hæfa tilefni dagsins. Þá má nefna að á laugardaginn munu nemendur úr 7. bekk koma fram á skemmtun á Löngumýri sem Skagfirski kammerkórinn stendur fyrir. Dagskráin nefnist í tali og tónum og hefst kl. 16.

Hinn árlegi dagur gegn einelti var haldinn hátíðlegur með fjölbreyttum hætti.

Í dag 12. nóvember voru kynntar endurskoðaðar skólareglur og punktakerfi. Leitast var við að einfalda þær reglur sem fyrir voru og höfða meira til ábyrgðar nemenda. Um skólareglur og punktakerfi í heild sinni er hægt að skoða undir flipanum NEMENDUR. Grunnreglurnar eru eftirfarandi: 1. Við mætum stundvíslega í allar kennslustundir. Forráðamenn tilkynna forföll tímanlega til skóla og skólabílstjóra. 2. Við berum virðingu fyrir sjálfum okkur og öðrum og sýnum jákvæðni í öllum samskiptum. 3. Við sýnum engum ofbeldi hvort sem er andlegt eða líkamlegt. 4. Við göngum snyrtilega um skólann og berum virðingu fyrir eigum hans og annarra. 5. Við komum í klæðnaði sem hentar veðurfari hverju sinni. Yfirhafnir og útiskór eru geymd í útifatageymslu og ekki notuð innanhúss. 6. Við notum hvorki tóbak né vímuefni. 7. Við notum ekki farsíma/ vasatölvur (I phone, Mp 3 spilara, I-pad o.fl.) í kennslustundum nema með leyfi kennara. Slíkt er skilið eftir á skólaborðum áður en farið er á salerni eða í styttri ferðir úr kennslustund. 8. Við sitjum öll til borðs í matsal skólans á matmálstímum og þar notum við ekki farsima/vasatölvur. 9. Við hlítum fyrirmælum kennara og annars starfsfólks. 10. Við gerum okkar besta í starfi og leik.