Fréttir

Lagt var af stað snemma á mánudagsmorgni með nesti og nýja skó áleiðis til Sauðárkróks. Þar voru heimsóttar ýmsar stofnanir, s.s. Gestastofa sútarans, Mjólkursamsalan, Iðja-Hæfing og Skammtímavistun. Sjá fleiri myndir á fésbókinni.

Það voru 45 nemendur og fjórir starfsmenn skólans, sem samfögnuðu í Laugardagshöll sl. föstudagskvöld. Það að komast í úrslit á landsvísu og ná 8. besta árangri er þess virði að fagna vel og lengi. Vésteinn, Fríða Isabel, Sigfinnur og Rósa Björk sýndu mikla yfirvegun og dugnað þegar á hólminn var komið. Það er ekki sjálfgefið þegar hundruð manna eru samankomin og alþjóð að horfa á í sjónvarpi. Innkomuliðið var skipað ofantöldum keppendum ásamt Einari og Sigríði Vöku varakeppendum. Þá má ekki gleyma lukkudýrinu Helga Fannari krókódíl og lukkuálfinum Margréti. Hér má sjá mynd frá keppniskvöldinu.

Góðir gestir heimsóttu skólann í gær til að fylgja eftir foreldraverðlaunum 2013 fyrir verkefnið Sveitadagar að vori í Varmahlíðarskóla. Heimsóttu þau bæi í Lýtingsstaðahreppi, skoðuðu mismunandi búskap og spjölluðu við nemendur og foreldra. Frá Heimili og skóla komu Hrefna Sigurjónsdóttir, framkvæmdastjóri og Anna Margrét Sigurðardóttir, formaður. Frá mennta- og menningarmálaráðuneytinu komu Guðni Olgeirsson, sérfræðingur og Guðrún Birna Jóhannsdóttir, verkefnisstjóri.

Nýlega lögðu nemendur í landbúnaðarvali, ásamt Óla kennara, land undir fót. Heimsótt voru fjögur góðbýli í nágrenninu og fræðst um búskapinn af ábúendum.

Nú eru nemendur dreifðir um sveitir héraðsins við hin fjölbreyttustu sveitastörf. Hér má sjá flotta mynd af Óskari og Dalmari með sinn hvorn lambhrútinn. Fleiri myndir eru á fésbókasíðu skólans.

Skátastarfið hefur verið öflugt í vetur að sögn Sólrúnar Jónu Ásgeirsdóttur. Þriðjudaginn 6. maí sl. var haldin vígsluhátíð og var þessi mynd tekin af því tilefni. Það voru 11 nýir skátar að vígjast og 9 skátar að færast úr Fálkaskátum í Dróttskáta og fengu nýja klúta.

Úrslit í NKG 2014 liggja fyrir. Um 1800 umsóknir bárust frá nemendum í 5.., 6., og 7. bekk í 43 grunnskólum um allt land. Valdir voru 45 þátttakendur út frá viðmiðum um raunsæi, hagnýti og nýnæmi. Þrír nemendur í 7. bekk Varmahlíðarskóla, sem sendu inn hugmyndir í keppnina komust áfram í úrslit og fá að taka þátt í vinnusmiðju dagana 22. og 23. maí nk. í Háskólanum í Reykjavík. Það eru þeir Andri Snær Tryggvason, Ari Óskar Víkingsson og Þórir Jóelsson. Birgitta Sveinsdóttir kennari hélt utan um vinnu nemenda í hugmynda- og umsóknarferlinu. Til hamingju!

Kvenfélag Lýtingsstaðahrepps kom færandi hendi í vikunni. Elín Sigurðardóttir fyrir hönd kvenfélagsins kom með gjafakort að andvirði kr. 70.000 sem rennur til kaupa á vatnsvél í íþróttahúsið. Bestu þakkir fyrir rausnarlegt framlag.