Fréttir

Margt hefur gerst í skólastarfi nú á vordögum sem ekki hefur ratað í fréttir á síðunni. Hér er hægt að skoða myndir af ýmsum atburðum:

Nemendur í landbúnaðarvali, ásamt Óla kennara, lögðu land undir fót þriðjudaginn 29. apríl sl. Heimsótt voru fjögur góðbýli í nágrenninu og fræðst um búskapinn af ábúendum.

Danssýning nemenda fór fram föstudaginn 23. maí.

Lokahóf Nýsköpunarkeppni grunnskólanna var haldið í gær eftir tveggja daga vinnusmiðju þeirra sem komust í úrslit. Verðlaun voru veitt í þremur aðalflokkum. Þórir Árni Jóelsson hreppti silfurverðlaun fyrir hönnun sína í flokknum Sköpunarkraftur, frumkvæði og uppfinningagleði og tók við verðlaunum af sjálfum forsetanum Ólafi Ragnari Grímssyni. Hann hannaði "Ferðabrú fyrir fé og hross". Nokkrir þátttakenda kynntu sín verkefni við hátíðahöldin. Þar á meðal voru Andri Snær Tryggvason og Ari Óskar Víkingsson sem kynntu hugmynd sína og útfærslu á hlaupahjólatösku. Þeir fengu bikar fyrir góða framsögn og upplýsingamiðlun sem JC á Íslandi veitir einum keppanda ár hvert. Til hamingju allir saman!

Þemavikan er stútfull af fjölbreyttum verkefnum. Danskennsla er á hverjum degi fyrir alla hópa sem lýkur með stórri sýningu á föstudaginn kl. 12:15 í íþrótthúsinu. Það er danskennarinn Ingunn Margrét Hallgrímsdóttir búsett á Dalvík sem sér um fjörið að þessu sinni.

Lagt var af stað snemma á mánudagsmorgni með nesti og nýja skó áleiðis til Sauðárkróks. Þar voru heimsóttar ýmsar stofnanir, s.s. Gestastofa sútarans, Mjólkursamsalan, Iðja-Hæfing og Skammtímavistun. Sjá fleiri myndir á fésbókinni.

Það voru 45 nemendur og fjórir starfsmenn skólans, sem samfögnuðu í Laugardagshöll sl. föstudagskvöld. Það að komast í úrslit á landsvísu og ná 8. besta árangri er þess virði að fagna vel og lengi. Vésteinn, Fríða Isabel, Sigfinnur og Rósa Björk sýndu mikla yfirvegun og dugnað þegar á hólminn var komið. Það er ekki sjálfgefið þegar hundruð manna eru samankomin og alþjóð að horfa á í sjónvarpi. Innkomuliðið var skipað ofantöldum keppendum ásamt Einari og Sigríði Vöku varakeppendum. Þá má ekki gleyma lukkudýrinu Helga Fannari krókódíl og lukkuálfinum Margréti. Hér má sjá mynd frá keppniskvöldinu.