Fréttir

Eins og margir vita sem heimsækja þessa síðu, sýndu nemendur í 1. - 6. bekk söngleikinn Ávaxtakörfuna þann 18. nóvember. Leikstjórinn Jenný Lára Arnórsdóttir var að sögn afar ánægð með sýninguna og ungu leikarana. Myndir voru teknar á generalprufunni, hægt er að sjá þær með því að smella á ,,lesa meira".

Aðventugleði foreldrafélagsins verður laugardaginn 26.nóvember kl 13-15 í Varmahlíðarskóla. Föndurstöðvar verða í skólastofum á neðri hæðinni, jólakortagerð, jólaperl, tréplatti, pappírsföndur og piparkökuskreytingar. Tónlistaratriði frá tónlistarskólanum í setustofunni. 10.bekkur verður með kaffihús í mstsalnum og selur vöfflur og kakó til styrktar ferðasjóði sínum. Allir velkomnir að kíkja við. Gott væri að hafa pennaveskið með og gaman ef sem flestir mættu með jólasveinahúfu.

Í dag heimsóttu fulltrúar Rauða Krossins nemendur 7. - 10. bekk með fyrirlestur sem kallast ,,Vertu næs". Þau Juan og Ola töluðu um hversu mikilvægt það er að sýna innflytjendum skilning þegar þeir reyna að komast inn í menningu og tungumál okkar. Þau bentu á þær áskoranir sem nýir íbúar glíma við og hversu mikilvægt það er að gefa fólki tækifæri og sýna þolinmæði en ekki taka á móti fólki með fordómum.

Föstudaginn 18. nóvember kl. 16:00 sýnir 1.-6. bekkur Varmahlíðarskóla leikritið Ávaxtakörfuna í Miðgarði. Leikstjóri er Jenný Lára Arnórsdóttir. Kaffiveitingar að lokinni sýningu. Allir velkomnir og við minnum á að frístundastrætó ætlar að aka frá Sauðárkróki og Hofsósi.

Ævintýraóperan Baldursbrá var flutt í setustofunni í dag, en það er verkefnið List fyrir alla sem stendur fyrir viðburðinum. Höfundar óperunnar eru Gunnsteinn Ólafsson og Böðvar Guðmundsson.

Í tengslum við árlegan fræðsludag starfsmanna leik-, grunn- og tónlistarskóla Skagafjarðar þann 11. nóvember n.k., sem að þessu sinni er helgaður lestri og læsi, er boðað til funda með foreldrum barna í Skagafirði. Fulltrúar úr læsisteymi Menntamálastofnunar mæta á fundina og fjalla um mikilvægi þess að taka virkan þátt í lestrarnámi barna sinna frá unga aldri. Nú er verið að leggja lokahönd á sérstaka læsisstefnu fyrir Sveitarfélagið Skagafjörð og eru fundir þessir liðir í þeirri vinnu

Á morgun, föstudag, halda nemendur 10. bekkjar dýrindis kökubasar til styrktar ferðasjóð sínum. Hefst hann kl. 14:00 niðri í Kaupfélaginu í Varmahlíð og stendur yfir þar til síðasta sort er seld.