Fréttir

Frá og með þessu skólaári sem nú gengur í garð verða námsgögn nemendum að kostnaðarlausu. Þessi ákvörðun var tekin á nú í byrjun ágúst og bætast þá sveitafélögin í Skagafirði við 22 önnur sveitafélög á landinu sem hafa ákveðið að greiða námsögn fyrir nemendur.

Skóladagatal 2017-2018 er komið á heimasíðu skólans. Skólastarf hefst með starfsmannafundi miðvikudaginn 15. ágúst. Skólasetning verður miðvikudaginn 23. ágúst, tímasetning nánar auglýst á vef skólans þegar nær dregur. Kveðja, skólastjórnendur.

Innritun nýrra nemenda stendur yfir fyrir skólaárið 2017-2018.

Vegna náms- og kynnisferðar starfsfólks verður skrifstofa skólans lokuð frá 29. maí til 2. júní. Hefðbundin opnun eftir Hvítasunnu.

Skólaslit Varmahlíðarskóla og útskrift 10. bekkjar verður við hátíðlega athöfn í Miðgarði kl. 20:00 í kvöld, miðvikudaginn 24. maí. Dagskrá er hefðbundin, skólastjóri og aðstoðarskólastjóri fara yfir starf vetrarins. Formenn nemendaráðs flytja ávörp og tónlistaratriði eru flutt. Allir nemendur fá afhent sín vitnisburðarskírteini. Hápunktur athafnarinnar er útskrift 10. bekkjar og afhending viðurkenninga. Kaffiveitingar í skólanum að athöfn lokinni.

Að þessu sinni komust 4 nemendur Varmahlíðarskóla áfram í Nýsköpunarkeppni grunnskólanna. Dómnefnd NKG valdi 25 hugmyndir sem komust í svokallaða vinnusmiðju og keppa til úrslita. Hugmyndirnar 25 voru valdar úr hópi 1100 umsókna sem bárust í NKG árið 2017. Þær Lilja Diljá Ómarsdóttir og Þóra Emilía Ólafsdóttir úr 6. bekk fóru áfram með hugmyndina “Barnabjargari”. Og þeir Indriði Ægir Þórarinsson og Óskar Aron Stefánsson úr 7. bekk komust áfram með tvær hugmyndir, þ.e. “Lyklaklemmu” og “Einfalda markatöng”. Vinnusmiðjan hófst í gær og verða úrslit gjörð kunn í lokahófi á laugardag.

Stærðfræðikeppni Fjölbrautarskóla Norðurlands vestra, Menntaskólans á Tröllaskaga og 9. bekkjar hefur verið haldin árlega í 20 ár. Úrslitakeppnin fór fram í gær, þriðjudaginn 25. apríl. Stærðfræðikennarar framhaldsskólanna sjá samningu og yfirferð keppnisgagna, en grunnskólarnir um fyrirlögn í undankeppni. Undankeppnin fór fram í mars og komust 15 nemendur áfram í úrslitakeppnina. Einn nemandi Varmahlíðarskóla keppti í úrslitum, hún Jódís Helga Káradóttir sem náði öðru sæti. Allir þátttakendur fengu viðurkenningar og gjafir fyrir þátttökuna og voru verðlaun vegleg að vanda. Við óskum Jódísi Helgu hjartanlega til hamingju með árangurinn.

Það er komið að því! Úrslitakeppni skólahreystis í Laugardalshöll fer fram í kvöld kl. 20:15. Viðburðurinn verður í beinni útsendingu á RÚV. Unglingar Varmahlíðarskóla halda suður yfir heiðar í dag til að fylgja þátttakendum og hvetja lið skólans til dáða. Litur skólans er grænn og með í för hafa slegist einhver græn furðu- og lukkudýr sem munu leggja okkur lið við að hvetja lið skólans til dáða.

Á sumardaginn fyrsta, fimmtudaginn 20. apríl, verður sundlaugin í Varmahlíð opin kl. 10:00-15:00.