Fréttir

Vikuna 9.-13. maí verður sundlauginni lokað vegna viðgerðar og hreinsunar.

Í gær afhentu nemendur í 7. og 8. bekk afrakstur áheitasöfnunar sinnar, honum Ívari Elí og föður hans Sigurjóni. Síðustu vikur hafa þessir 32 krakkar safnað 1.113.829 krónum (einnimiljóneitthundraðogþrettánþúsund)! Öllum þeim sem tóku krökkunum opnum örmum og styrktu þetta verðuga málefni eru færðar innilegar þakkir! Það er gott að búa í litlu samfélagi þar sem börnin okkar læra af fyrstu hendi samkennd með náunganum og að þeirra framtak skipti máli.

Við minnum á foreldrafræðslu í dag kl 17:00 frá SAFT (SAmfélag, Fjölskylda og Tækni). Fjallað verður um örugga netnotkun, góðar netvenjur, samskipti og hættur. Við vonumst til að sjá ykkur öll.

Nú styttist óðum í áheitahlaup 7. og 8. bekkjar til styrktar Ívari Elí Sigurjónssyni. Síðastliðna daga hafa nemendur ekki slegið slöku við og safnað áheitum og styrkjum með miklum krafti. Á miðvikudaginn kl. 9:00 leggja svo fyrstu hlauparar af stað frá skólanum og verða svo alltaf einhverjir á hlaupum allan daginn þar til síðustu menn snúa aftur til skólans um kvöldmatarleytið.

Stærðfræðikeppni Fjölbrautarskóla Norðurlands vestra, Menntaskólans á Tröllaskaga og 9. bekkja fór fram í FNV föstud. 15. apríl. Það var Friðrik Snær Björnsson, nemandi okkar í Varmahlíðarskóla, sem sigraði keppnina.

Þriðjudaginn 12. apríl fóru fram úrslit í Stóru upplestrarkeppninni í Bóknámshúsi Fjölbrautaskóla Norðurlands vestra. Tólf nemendur úr fjórum skólum tóku þátt auk varamanns frá hverjum skóla. Nemendur lásu valda texta og ljóð auk ljóðs að eigin vali.

Sveitafélagið Skagafjörður auglýsir eftir starfsmanni til afleysinga í sundlauginni í Varmahlíð. Þeir sem hafa áhuga geta smellt á linkinn hér að neðan.

Miðvikudaginn 16. mars fór undankeppni Norðurlandsriðils Skólahreysti fram í íþróttahöllinni á Akureyri. Dagmar Ólína, Dalmar Snær, Hanna Rún og Jón Gylfi kepptu fyrir hönd Varmahlíðarskóla og öflugt stuðningslið úr 8.-10. bekk hvatti þau dyggilega. Skemmst er frá því að segja að Varmahlíðarskóli hreppti 3. sætið eftir harða keppni og verður það að teljast afar viðunandi árangur miðað við heilsufar keppenda dagana á undan. Í ljósi þessa árangus má fyllilega sjá að Varmahlíðarskóli er á góðri leið með að skapa sér nafn í þessari keppni og í framtíðinni mun markið ávallt vera sett á eitt af þremur efstu sætunum.

Forkeppni Stærðfræðikeppni 9. bekkinga 2016 var haldin í mars. Keppnin er samstarfsverkefni FNV og MTR við grunnskóla á Norðurlandi vestra, í Fjallabyggð og á Dalvík. Að þessu sinni tóku 109 nemendur þátt. 15 efstu nemendurnir taka þátt í úrslitakeppni sem fer fram 15 .apríl í Bóknámshúsi FNV á Sauðárkróki. Þrír nemendur Varmahlíðarskóla komust áfram í úrslit, það eru: Ari Óskar Víkingsson, Ellert Kárason og Friðrik Snær Björnsson. Óskum við þeim innilega til hamingju með árangurinn.

Nemendur í 7. bekk Varmahlíðarskóla tóku þátt í upplestararhátíð þann 10. mars s.l. Nemendur lásu texta og ljóð af eigin vali sem þau höfðu undirbúið og æft undir leiðsögn Sigrúnar Benediktsdóttur umsjónarkennara. Allir þátttakendur stóðu sig frábærlega.