Fréttir

Fljótlega eftir að starfið fór af stað í haust lögðu nemendur 9.bekkjar upp í ferðalag og hittu fyrir Haukdæli, Gísla og Þorkel Súrssyni, Þórdísi systur þeirra, Auði konu Gísla og Véstein bróður hennar svo að nefnd séu nokkur nöfn. Farið var um Barðaströnd og Dýrafjörð, í Geirþjófsfjörð og út í Hergilsey á Breiðafirði svo að nefndir séu nokkrir staðir sem máli skipta í sögunni. Var ferðin hin fróðlegasta og var samróma álit ferðalanga að fátt hefði breyst í mannlegu eðli á þeim árum sem liðnir eru frá atburðunum og gerðu nemendur áfangaskýrslur um upplifun sína af ferðinni og gerðu þar grein fyrir því áhugaverðasta og eftirtektarverðasta sem þeir tóku eftir um mannlegt eðli, hefnd, réttlæti og ástina sem eru algeng stef á flestum tímum. Ferðalagið sjálft fór reyndar fram í kennslustofunni en þaðan er hægt að komast langt með lestri, umræðum og einnig getur verið heillandi að sjá Gísla og félaga eins og valið var að láta þá birtast í Útlaganum.

Á Laugarvatni rekur UMFÍ ungmennabúðir og býðst 9.bekkingum að fara þangað og dvelja eina viku við leik og störf. Þar hittast u.þ.b. 80-90 nemendur úr nokkrum skólum og takast á við margs konar verkefni sem reyna á kjark og þor og samhliða gefst færi á því að víkka sjóndeildarhringinn og að kynnast nýju fólki sem hefur önnur og ólík sjónarmið. Til þess að nemendur kynnist sem mest er mikið um hópastarf og er blöndun úr skólum markviss og í frjálsum tíma fá nemendur gott færi til að ræða málin því að tölvur og símar glepja ekki á þessum stað því að í búðunum má ekki nýta slíka tækni. Þegar hugsað er um aðra viku októbermánaðar lifir minning um góða daga og ungmennafélagsanda.

Þó að hver dagur sé um margt öðrum líkur er hver og einn dagur samt einstakur því að þá er hægt að stíga fyrstu skrefin í nýja átt. Eftir margs konar ævintýri á haustdögum er komið að næsta kafla í skólalífinu. Í nýafstöðnum foreldraviðtölum var farið yfir upphafskaflann og leiðin að næsta áfanga vörðuð.

Alllöng hefð er fyrir því að hlaupa skólahlaup að hausti. Oft er reynt að velja bjartan og góðan haustdag en þó er ekki alltaf gott að sjá slíka daga út af löngu færi. Þó var afráðið að velja föstudaginn 23.september til hlaupsins í ár og þegar hann rann upp kom í ljós að hann hentaði einkar vel til útiveru og hlaupa, haustsvali með sólarglennum þegar leið á dag. Skólahlaupið er hluti af íþróttaviku Evrópu og hét áður Noprræna skólahlaupið. Hlaupið er 10 kílómetrar og er kapp margra að komast alla leið á sem skemmstum tíma því að eins og allir muna getur verið mun skemmtilegra að hlaupa en ganga, einkum ef veður er gott.